Á að verða flottasta sundlaugin á landinu

Á kvenréttindadaginn 19. júní skrifuðu athafnakonurnar Steinunn Jónsdóttir og Lilja Pálmadóttir undir samning við fulltrúa sveitarfélagsins í Skagafirði um byggingu sundlaugar á Hofsósi en þær stöllur hafa komið sér vel fyrir á glæsilegum sveitabæjum þar í kring. Skrifað var undir samninginn á Bæ þar sem Steinunn hefur aðsetur en þar er einnig starfrækt listasetur sem nýlega var opnað og hefur strax fengið mikil og góð viðbrögð enda þykir náttúrufegurðin þar einstök.

Þær Steinunn og Lilja skrifuðu undir viljayfirlýsingu um þessa gjöf í lok mars. Sundlaugin verður með öllu, 25 metra laug, heitum pottum og glæsilegu þjónustuveri.

Arkitektinn Sigríður Sigþórsdóttir hefur verið ráðinn til að hanna sundlaugina og hún kynnti frumtillögur sínar á fundinum. „Okkur líst vel á þessar hugmyndir og þarna má sjá skemmtilegar pælingar,“ segir Guðmundur Guðlaugsson, sveitarstjóri Skagafjarðar. Eitt helsta aðdráttarafl sundlaugarinnar verður þó eflaust staðsetningin en reiknað er með að hún rísi fyrir vestan Suðurbraut við Staðbjargarvík. „Þarna geta sundlaugargestir meðal annars séð yfir til Drangeyjar,“ útskýrir Guðmundur.

Guðmundur upplýsir að reiknað sé með að taka sundlaugina til notkunar á næsta ári en viðurkennir að þetta sé knappur tími. „En við setjum okkur háleit markmið og viljum standa við þau,“ segir Guðmundur sem hikar ekki við að lýsa því yfir að þetta verði ein flottasta sundlaug landsins.