Van Halen farinn í meðferð

Eddie Van Halen er farinn í meðferð til að vinna í sjálfum sér. Það er því óljóst hvort að hljómsveitin hans komi saman í Rock and Roll Hall of Fame í næstu viku eins og áætlað var.

Van Halen er 52 ára að aldri og hefur lengi barist við Bakkus. Hann hefur einnig unnið bug á krabbameini í tungu. Í opnu bréfi til aðdáenda sinna segir Eddie að honum hafi alltaf fundist það vera skylda sín að gera sitt besta fyrir þá. Eins og er finnist honum hann ekki geta það. Því hafi hann tekið þá ákvörðun að fara í meðferð til að vinna í sjálfum sér. Hann muni þá geta lagt sig 110% fram fyrir aðdáendur sína í framtíðinni. Það er því vonandi að meðferðin gangi vel hjá honum.