Æfa viðbrögð við inflúensu heimsfaraldri

Næsta mánudag verður sameiginleg æfing lögreglunnar, Landspítala, sóttvarnalækna, heilbrigðis- og tryggingamálaráðuneytis og dóms- og kirkjumálaráðuneytis haldin undir yfirskriftinni Samábyrgð. Æfð verða viðbrögð við heimsfaraldri inflúensu, samkvæmt drögum að landsáætlun, sem embætti sóttvarnalæknis og ríkislögreglustjóra hafa unnið að ásamt fjölda aðila um allt land.

„Heimsfaraldur inflúensu getur lamað samfélagið á skömmum tíma og mun reyna á flesta þætti samfélagsins ef skæð inflúensa sem herjar á heimsbyggðina nær til landsins. Að þessu sinni verður þáttur lögreglustjóra og sóttvarnalækna samæfður þar sem þeirra starf í slíkum faraldri er mjög umfangsmikið. Munu þeir fá mörg mismunandi verkefni til úrlausnar í æfingunni sem þeir þurfa að leysa af hendi í sínu umdæmi. Mikil áhersla er lögð á samvinnu lögreglustjóranna og sóttvarnalækna umdæma og svæða í áætluninni. Starfsmenn almannavarnadeildar ríkislögreglustjórans og sóttvarnalæknis höfðu framsögu á fundinum þar sem farið var yfir áhættumat vegna faraldurs, gerð viðbragðsáætlunarinnar og tilhögun æfingarinnar," segir í frétt á vef lögreglunnar

Fulltrúar þeirra sem að æfingunni koma funduðu í dag og voru um 60 manns viðstaddir.