Posh Spice hrellir ljósmyndara

Victoria Beckham hefndi sín í gær á aðgangshörðum paparössum sem elta hana hvert sem hún fer.

Hópur ljósmyndara beið eftir henni þegar svartur sportjeppi hennar renndi upp að verslun á West Third Street í Los Angeles. Öryggisverðir ýttu ljósmyndurunum frá bílnum en þeir æstust enn frekar við það. Loks opnaðist hurðin á bílnum og aðstoðarmenn stjörnunnar leiddu út ljóshærða, sólgleraugnaskrýdda plasteftirmynd hennar í raunstærð.

Að sögn var dúkkan nokkuð þyngri en Posh sjálf.

Atburðurinn var myndaður, og verður hluti af nýjum raunveruleikaþætti Victoriu, sem frumsýndur verður á NBC-sjónvarpsstöðinni í sumar.