Britney vildi leðursæti og neitaði að fljúga

Britney Spears heldur áfram að koma sér í fréttirnar fyrir eitthvað allt annað en tónlist sína. Í gær greindi News of the World frá því að söngkonan hefði gengið út úr flugvél skömmu fyrir flugtak en hún var á leið frá Los Angeles til Florida. Ástæðan fyrir óánægju Britney var að sæti vélarinnar voru ekki klædd leðri.

„Þetta var með ólíkindum. Dyrunum hafði verið lokað og allt var reiðubúið fyrir flugtak. Skyndilega stökk Britney á fætur og heimtaði að fara út úr vélinni. Hún sagðist ekki vilja fljúga þar sem engin leðursæti voru í flugvélinni,“ er haft eftir einum farþega flugsins í News of the World.

Flugstjórinn neyddist til að biðja aðra farþega afsökunar á uppákomunni en tæplega hálftíma seinkun varð á fluginu á meðan Britney og hennar fylgdarlið strunsuðu út úr flugvélinni.