Traveling Wilburys: Collection - fjórar stjörnur

Á The Traveling Wilburys Collection eru báðar plötur hljómsveitarinnar, nokkur aukalög og DVD diskur með þeim fimm myndböndum sem hún gerði og heimildarmynd um tilurð og sögu sveitarinnar. Semsagt allt það sem skiptir máli í einum pakka.

Traveling Wilburys var einstök sveit í poppsögunni. Þessi mesta súpergrúppa allra tíma hafði innanborðs þá George Harrison, Bob Dylan, Roy Orbison, Tom Petty og Jeff Lynne. Hún varð til fyrir hreina tilviljun árið 1988 þegar Harrison þurfti að taka upp B-hliðarlag fyrir smáskífu. Sveitin hefði sennilega aldrei getað neitt ef einhver hefði reynt að hugsa hana upp og plana og hún virkaði svona vel af þeirri ástæðu helstri að fimmmenningarnir voru allir góðir vinir.

Textar og lög Traveling Wilburys voru samin á staðnum og tekin upp nánast samstundis. Það segir eitthvað um hæfileika þessara fimm tónlistarmanna að báðar plöturnar eru fullar af fínum lagasmíðum. Annað sem maður tekur strax eftir er söngurinn. Roy Orbison (sem féll frá eftir gerð fyrri plötunnar) nýtur sín sérstaklega vel og hinir skila sínu líka vel hver með sínu nefi. Það er auðvitað mikill fengur í hljómsveit sem hefur Bob Dylan innanborðs og manni hlýnar um hjartarætur í hvert sinn sem karlinn hefur upp raust sína, enda virkar hann sérstaklega afslappaður og sáttur í þessu samstarfi.

Traveling Wilburys heyrir sögunni til þar sem bæði Roy Orbison og George Harrison eru farnir yfir móðuna miklu. Collection pakkinn sem er unninn af hinu rómaða endurútgáfufyrirtæki Rhino Records setur punktinn aftan við feril hljómsveitarinnar. Hér er sagan öll.

Trausti Júlíusson