Kópavogur kaupir mun ódýrara en Reykjavík

Lóðarverð á hverja íbúð sem Kópavogsbær greiðir landeiganda Elliðavatns samkvæmt eignarnámssamkomulagi við hann er vel innan við tvær milljónir á íbúð, að sögn Gunnars Birgissonar bæjarstjóra.

Hann segir að með samkomulaginu sé bærinn búinn að tryggja sér byggingaland til að minnstakosti 15 ára. Fermetraverð í byggingalandinu leggur sig á tólf til fjórtán hundruð krónur en til samanburðar greiddi Reykjavíkurborg Kjartani Gunnarssyni vel á sjötta þúsund krónur á fermetra í landsspildu sem borgin tók eignarnámi af honum nýverið.

Bærinn getur byggt tvö þúsund íbúðir á svæðinu og verður lóðarkostnaður á hverja íbúð, án gatnagerðar, því aðeins sautján hundruð þúsund krónur. Eigandi Elliðavatns fær einnig heimild til að byggja 500 íbúðir á landssvæði sem hann heldur eftir.

Auk byggingarlandsins eignast kópavogsbær uppland, sem ekki verður byggt á, alveg að þjóðlendumörkum. Fyrir báða hluta greiðir bærinn 2250 milljónir króna. Bærinn annast einnig á eigin reikning gatnagerð og lagnir í byggingalandi eiganda Elliðavatns þannig að heildarútgjöld bæjarins á löngum tíma verða 3,2 til 3,5 milljaðrar króna, að sögn Gunnars Birgissonar bæjarstjóra.