Erfitt fyrir Bruce Willis

Leikarinn Bruce Willis segir að mikið hafi reynt á sig við gerð hasarmyndarinnar Die Hard 4.0. „Fyrir ári síðan þegar við byrjuðum að taka upp myndina var áhættuþátturinn mjög hár. Það eru miklar líkur á mistökum við gerð myndar eins og þessarar en þetta fór allt á besta veg,“ sagði Willis sem er 52 ára.

Bætti hann því við að leikstjóri myndarinnar, Len Wiseman, hafi aðeins verið 16 ára þegar fyrsta Die Hard-myndin var gefin út árið 1988. Willis þurfti að slást við konu í myndinni og mun seint gleyma þeim viðskiptum. „Þetta er í fyrsta sinn sem ég slæst við konu í kvikmynd og tapa,“ sagði hann.