Til heiðurs Patró

Hljómsveitin Þorpararnir hefur gefið út sína fyrstu plötu sem nefnist Þorpið: Ólíkir molar úr sömu skál. Meðlimir sveitarinnar eru brottfluttir Patreksfirðingar og vilja þeir með plötunni heiðra bernskubyggð sína. Þrír þeirra búa á höfuðborgarsvæðinu og þrír til viðbótar á Akureyri.

„Þetta er í áttina að rokki en mjög blandað. Þessi tónlist spannar vítt svið,“ segja Þorpararnir Haukur Hafsteinsson og Sævar Árnason um plötuna, sem hefur að geyma fjórtán lög.

Í Þorpurunum eru á ferðinni menn sem lögðu grunninn að hljómsveitarmenningu Patreksfjarðar í sveitum eins og Lóu léttlyndu, Patró og Útlendingahersveitinni þar sem tilgangurinn var að skemmta bæjarbúum á dansleikjum og öðrum samkomum.

Útgáfutónleikar vegna plötunnar voru haldnir á Patreksfirði á sjómannadaginn og fengu Þorpararnir þar mjög góðar viðtökur að sögn þeirra Hauks og Sævars.