Fjölrammungar Hugleiks

Bókin Ókei bæ! lítur helst út eins og vinaleg barnabók en þegar betur er að gáð er hér á ferðinni nýjasta sagnasafn Hugleiks Dagssonar. Bókin er í stærra broti en fyrri bækur höfundarins en sögurnar eru einnig flestar lengri en þó er um sama sagnastíl Hugleiks að ræða sem flestir hljóta nú að kannast við.

 „Þetta er samansafn sagna sem ég hef gert í þessum stíl. Einhvern hluta gerði ég fyrir Grapevine og eitthvað fyrir DV en þetta er líka mikið sem ég hef bara verið að gera að gamni mínu,“ segir Hugleikur. „Þetta lítur svolítið út eins og litabók sem er bara mjög skemmtilegt. Stærðin er hin klassíska evrópska, eins og stærð Ástríks bókanna. Ég þurfti að hafa bókina stærri því nú er ég að gera sögur sem ég kalla fjölrammunga en hef hingað til verið að gera einrammunga - þar sem hver saga var einn rammi. Það er eiginlega auðveldara að gera fjölrammunga því annars þarf maður að setja alla söguna í einn ramma.“

Auk nýju bókarinnar er stutt í að önnur bók eftir Hugleik verði gefin út í Bretlandi en síðasta haust kom út bókin Avoid Us. Næsta bók verður Bjargið okkur en hún mun heita „Is this supposed to be funny“ og kemur út í haust.