Lætur gera úttekt á stöðu neytendamála

Viðskiptaráðherra hefur falið Félagsvísindastofnun, Hagfræðistofnun og Lagastofnun Háskóla Íslands að vinna ítarlega rannsókn á stöðu neytendamála hér á landi.

Rannsóknin er liður í heildarstefnumótun á sviði neytendamála sem ráðherra hyggst hrinda af stað og verða áherslur ráðuneytisins kynntar á blaðamannafundi á morgun.

Fram kemur í tilkynningu frá viðskiptaráðuneytinu að markmið stefnumótunarinnar sé meðal annars að vinna gegn háu verðlagi hér á landi, auðvelda almenningi að takast á við breytta heimilis- og verslunarhætti og styrkja og auka vitund neytenda um rétt sinn.

Þá er ætlunin að innleiða í auknum mæli upplýsingatækni í þágu neytenda og almennt styðja neytendur til virkrar þátttöku á vöru- og þjónustumörkuðum.