Nældi sér í breskan söngvara

Bandaríska leikkonan Kirsten Dunst er yfir sig ástfangin um þessar mundir eftir að hafa kynnst breska söngvaranum Johnny Borrell. Aðeins eru nokkrar vikur síðan Dunst og Borrell kynntust en það var þegar hljómsveit hans, Razorlight, var á tónleikaferðalagi í Bandaríkjunum.

Kirsten Dunst er svo hrifin af nýja kærastanum að hún flaug til London í síðustu viku og hefur dvalið í íbúð Borrells síðan þá. Kirsten fylgdist með kærastanum á tónleikum í London á sunnudagskvöld og eftir það fóru þau út á lífið.

„Þetta er alvöru samband og hún hefur elt hann eins og ástsjúkur hvolpur," segir heimildarmaður í breskum fjölmiðlum. „Kirsten flaug til London og það veit enginn hversu lengi hún verður þar. Hún er hins vegar að fara í upptökur í Evrópu innan tíðar svo þau ættu að geta hist reglulega í London."