Ekki hægt að útiloka að stíflan bresti

„Á þessum fundi komu fram verulegar áhyggjur fólks vegna stíflunnar," segir Aðalsteinn Sveinsson, oddviti Flóahrepps.

Hönnuðir Urriðafossvirkjunar kynntu áhættumat vegna hennar fyrir íbúum Flóahrepps í fyrrakvöldi. Urriðafossvirkjun nær til þriggja sveitarfélaga, Ásahrepps, Skeiða- og Gnúpverjahrepps auk Flóahrepps. Aðeins Flóahreppur hefur ekki gert ráð fyrir virkjuninni í aðalskipulagi sínu.

Í áhættumatinu segir að ef verður að byggingu stíflunnar yrði hún staðsett á mjög virku jarðskjálfta- og sprungusvæði. Hættugreining hafi leitt í ljós að mikil sprungugliðnun þvert á stífluna í jarðsjálfta gæti orðið til þess að hún rofnaði þó að hönnun stíflunnar miðist við stærsta jarðskjálfta sem búast megi við á svæðinu. Líkurnar á því væru þó aðeins 1 á móti 10.000. „Niðurstaðan er að ólíklegt er að stíflan bresti auk þess sem ekki myndu verða hamfaraflóð ef svo yrði," segir Aðalsteinn og bendir auk þess á að með stíflu mætti koma í veg fyrir náttúruleg flóð af völdum ísingar.

Landsvirkjun hefur fyrirhugað að reisa þrjár virkjanir í Neðri-Þjórsá og nefnast þær Hvammsvirkjun, Holtavirkjun og Urriðafossvirkjun. Í júní ákvað sveitarstjórn Flóahrepps að ekki yrði gert ráð fyrir virkjun í aðalskipulagi og segir í samþykkt þeirra um málið: „Meginástæða þess er að sveitarstjórn telur ekki nægilegan ávinning af slíkri virkjun fyrir Flóahrepp og íbúa hans né að bættur verði sá skaði sem áhrif virkjunarinnar hefði á vatnsverndarsvæði, ferðaþjónustu, lífríki í Þjórsá og landnotkun í nágrenni virkjunarinnar."

„Landsvirkjun kynnti okkur þá ákveðnar hugmyndir um mótvægisaðgerðir og tókum við málið aftur til athugunar," segir Aðalsteinn. Hann segir þær aðgerðir fyrst og fremst hafa falist í úrbótum á samgöngu- og vatnsveitumálum. Krafðist sveitarstjórnin þess einnig að fá áhættumat vegna framkvæmdanna.

Þorsteinn Hilmarsson, upplýsingafulltrúi Landsvirkjunar, segir að vegna þeirra kröfu hafi verið ákveðið að flýta vinnu í tengslum við Urriðafossvirkjun til að fá sem fyrst niðurstöðu frá Flóamönnum.

Aðalsteinn segir umhverfisáhrif vegna virkjunarinnar verða töluverð en á móti komi að þarna verði um endurnýjanlega orku að ræða. „Við spyrjum okkur samt að því hvern vanti eiginlega þessa virkjun. Okkur er ekki sama hvert orka hennar verður seld og á hvaða verði," segir Aðalsteinn.

karen@frettabladid.is