Hæ, ég er pabbi hennar Stellu ...

Paul McCartney tókst að fá leikkonuna Natalie Portman til að koma fram í nýjasta myndbandi sínu, þökk sé Stellu dóttur hans. McCartney er að gefa út plötuna "Memory Almost Full," sem þykir jafnast á við bestu verk hans. Natalie Portman kemur fram sem draugur í fyrsta myndbandinu af plötunni.

Natalie kaupir skó sem ekki eru framleiddir úr leðri af Stellu. Paul sem er 64 ára sagðist þess vegna hafa ákveðið að hringja í hana og vita hvort hún væri ekki til í að leika í myndbandinu.

"Hæ, ég er pabbi hennar Stellu..." er haft eftir honum á vefsíðu bítilsins.

Natalie leikur rafrænan draug sem lætur heillast af mandólínleik McCartneys. Hún hefur meðal annars leikið í myndunum "Closer" og "V for Vendetta" nýlega.

Myndbandið er af laginu "Dance Tonight" og er leikstýrt af Michael Gondry, sem gerði flest myndbönd Bjarkar Guðmundsdóttur, snemma á ferli hennar.

"Memory Almost Full" kemur út 5. júní og er 21. sólaplata Paul McCartney. Næsta plata á undan "Chaos and Creation in the Backyard," kom út 2005 og fékk góðar viðtökur.

Myndband Paul McCartneys með Natalie Portman er hér á YouTube.