Fá hjálp frá framleiðanda Bráðavaktarinnar

Nokkrar stjörnur úr bandaríska sjónvarpsgeiranum eru væntanlegar hingað til lands í ágúst, þar sem þær munu miðla af reynslu sinni til íslensks sjónvarpsfólks á ráðstefnu á vegum fyrirtækisins MediaXchange.

Ráðstefnan ber heitið „Outside the Box", en þar mun íslensku sjónvarpsfólki gefast tækifæri á að fá innsýn í framleiðsluferli leikins sjónvarpsefnis í Bandaríkjunum.

Björn Þórir Sigurðsson, dagskrárstjóri Skjás eins, hefur verið fyrirtækinu innan handar við skipulagningu, og hann segir ráðstefnuna frábært tækifæri fyrir íslenskt sjónvarpsfólk. „Kvikmyndasjóður Íslands er að auka fjármagn til framleiðslu sjónvarpsefnis, svo þetta er tilvalið tækifæri til að koma með smá ferskleika inn í þetta umhverfi," sagði hann. „Við eigum mikið af fagfólki sem vinnur við sjónvarp, en höfum kannski ekki haft tækifæri til að þjálfa okkur mikið," bætti hann við

Hingað til lands kemur til að mynda forstjóri Scott Free Productions, David Zucker, og rithöfundurinn Carol Flint, sem hefur skrifað og framleitt þætti á borð við Bráðavaktina, West Wing og The Unit.

Ráðstefnan einbeitir sér að framleiðsluferli leikins sjónvarpsefnis. „Það er kannski einna helst það sem hefur vantað hjá okkur. En með auknu fjármagni opnast nýir möguleikar, og ég veit að á öllum sjónvarpsstöðvunum er áhugi á að sinna þessu," sagði Björn. Til marks um það hafa sjónvarpsstöðvarnar þrjár, Pegasus, Saga film og Kvikmyndamiðstöðin, lagst á eitt til að ráðstefnan verði að veruleika.

Björn segir Bandaríkjamenn bera af í framleiðslu slíks sjónvarpsefnis. „Hiklaust. Og Danir hafa til dæmis náð góðum árangri með því að stúdera þetta. Þeir hafa fengið þrenn alþjóðleg Emmy-verðlaun á síðustu árum. Sven Clausen, einn aðalframleiðandi þeirra, hefur til dæmis unnið með þessu fyrirtæki. Hann framleiddi Örninn, Rejseholdet og Krónikuna svo eitthvað sé nefnt. Hann er nýbúinn að koma hingað, og nú förum við bara beint í kúna," sagði hann sposkur.

Ráðstefnan er opin öllum sem hafa áhuga á framleiðslu leikins sjónvarpsefnis. „Þetta er hugsað fyrir fagfólk, en þeir sem hafa áhuga á að snúa sér að skrifum á sjónvarpsefni, eru í fjölmiðlafræði eða ganga með einhverja hugmynd í maganum, eru velkomnir líka," sagði Björn. Ráðstefnan stendur yfir 22. til 24. ágúst.