Stella sýnir í London

Stella McCartney mun kynna Adidas-sumarlínu sína fyrir árið 2008 á tískuvikunni í London í fyrsta sinn í haust. Sýningin mun slá botninn í tískuvikuna.

„Adidas-lína Stellu mun bæta þessu íþrótta- „elementi" inn í tískuvikuna og slá botninn í þessa spennandi tískuhátíð," sagði Hilary Riva framkvæmdastjóri Breska tískuráðsins. Á sýningunni munu áhorfendur sjá alls kyns fallegan íþróttafatnað hvort sem hann er ætlaður jógaiðkun, hlaupum, leikfimi eða sundi.

Hilary Riva virðist vera að gera mikið til þess að breyta hugmynd fólks um tískuvikuna í London en þar hefur verið lögð áhersla á unga og róttæka hönnuði og reyndar hafa margir verið ánægðir með þá áherslu. Einnig hefur hún fengið bæði Luellu Bartley og Matthew Williamson til London auk þess sem orðrómur er uppi um að Alexander McQueen muni sýna ódýrari línu sína, McQ, í London. Auk þess hefur Hilary fagnað nýjum reglum um þyngd fyrirsæta en mikið hefur verið rætt um það mál síðustu mánuði.