Horfir á fótboltaleiki úr húsbílnum

„Þetta er einstaklega þægilegt og ég get ekki annað en mælt með þessu. Þetta er klárlega besta sætið á vellinum. Svo þegar lítið er að gerast í leiknum er hægt að kíkja á fréttirnar í sjónvarpinu,“ segir Hafnfirðingurinn Þórður Rúnar Þórmundsson, gallharður stuðningsmaður FH, sem horfir á heimaleiki sinna manna í Kaplakrika úr húsbílnum sínum.

„Ég byrjaði á þessu fyrir fjórum árum þegar það var mikil rigning úti. Þetta gafst einstaklega vel og nú get ég ekki hugsað mér að horfa á leikinn öðruvísi,“ segir Þórður, sem gjarnan tekur son sinn, Hörð Reyni, með sér á völlinn. Þeir feðgar láta síðan fara vel um sig á meðan leik stendur, fá sér að snæða og drekka kaffi – í skjóli fyrir hvers kyns veðrum og vindum.

„Það er allt til alls í bílnum,“ segir Þórður sem á það til að fá vallargesti til sín sem biðja um kaffi. „Það er sjálfsagt að gefa kaffi á meðan birgðir endast en ég skal ekki segja hvort mitt kaffi er betra en það sem er verið að selja í sjoppunni,“ sagði Þórður og hló en þess ber að geta að hann mætir á bílnum í fullu samráði við vallarstarfsmenn í Kaplakrika. -