Birta byggir sumarhús í Hvalfirði

Birta Björnsdóttir, fatahönnuður í Júníform og eiginmaður hennar hafa fest kaup á lóð í Hvalfirði og áforma að reisa þar sumarbústað. Birta vakti mikla athygli fyrr á árinu, eftir að Ragnhildur Steinunn Jónsdóttir klæddist fötum frá henni sem kynnir í Söngvakeppni Sjónvarpsins. Í kjölfarið rauk eftirspurn eftir fötum frá Birtu upp úr öllu valdi og búðin tæmdist á örfáum dögum.

Birta segir þá velgengni þó ekki vera ástæðuna fyrir lóðakaupunum. „Nei, almáttugur. Maður verður nú ekki beint ríkur á þessu,“ sagði hún. Júníform hefur þó gengið afar vel og hefur Birta leitað til saumastofu til að fá aðstoð við framleiðsluna. „Ég er með fólk á saumastofu til að hjálpa mér. Það er ennþá brjálað að gera þó það hafi auðvitað hægst aðeins um,“ sagði hún.

Sumarhúsið er ekki gamall draumur, að sögn Birtu. „Við fengum þessa flugu í hausinn á þessu ári og vorum svo heppin að við fundum strax lóð sem hentaði okkur vel,“ sagði hún. „Við fílum Hvalfjörðinn í botn, hann er leynd náttúruperla. Fólk gleymir honum svolítið, en það er ótrúlega fallegt þarna. Við erum að láta teikna húsið í rólegheitunum, en þetta verður gert í nánustu framtíð,“ sagði Birta.