Treystir ljónum betur en fólki

Kevin Richardson er nýjasta stjarnan í dýralífsþáttagerð og hefur verið nefndur næsti Steve Irwin. Hann hefur einstakt lag á ljónum og getur fengið villtustu karldýrin til að leika við sig.

„Ég hef verið kallaður klikkaður, oft og mörgum sinnum. En fyrir mér er miklu hættulegra að keyra á hraðbrautinni. Það er raunveruleg klikkun," segir Kevin, sem hefur sérhæft sig í atferli spendýra og starfar í ljónagarði í Suður-Afríku. Hann er 32 ára gamall og hefur rannsakað líf og hegðun ljóna frá unglingsaldri. Á þeim tíma hefur hann náð að þróa einstakan hæfileika sem gerir það að verkum að hann getur, algjörlega áhyggjulaus, sofið með heilli ljónahjörð og jafnvel kysst og knúsað ljónaunga með samþykki móðurinnar. Myndbönd með Kevin er að finna á YouTube og þættir með honum hafa verið sýndir á sjónvarpsstöðvum sem sérhæfa sig í dýralífi.

„Þau sjá mig sem eitt af þeim. Þau ná að tengja mig við sig og treysta mér," sagði Kevin þegar hann var spurður að því hvernig hann færi að. Hann segist ekki geta útskýrt hvernig hann nálgast ljónin öðruvísi en aðrir - fyrir honum sé þetta einfaldlega meðfætt. „Því hefur verið haldið fram að ég hafi verið ljón í fyrra lífi. Ég gef nú lítið fyrir það," segir Kevin, sem nefndur hefur verið næsti Steve Irwin, ástralski krókódílafræðingurinn sem lést á síðasta ári.

„Þetta er ótrúlegur og einstakur hæfileiki. Ljónin elska Kevin en samt sem áður fær hann alla okkar virðingu fyrir að þora að klappa og kyssa þessi dýr. Það er með ólíkindum," segir Ian Melass, eigandi ljónagarðsins sem Kevin vinnur í.

Ástríða og áhugi Kevins á villtum dýrum er langt um meiri en venja er hjá dýravinum. Segist hann jafnvel bera meiri tilfinningar til ljóna en eiginkonu sinnar.

„Lykilorðin eru ást og virðing. Ljónin skynja þá skilyrðislausu ást sem ég ber til þeirra," segir Kevin og bætir við að hann treysti ljónum miklu betur en mannfólki. „Ég hef aldrei áhyggjur af því að ljón muni stinga mig í bakið. Það eru miklu meiri líkur á að manneskjur komi mér í vandræði."