Eiður Smári kom eiginkonunni á óvart

Eiður Smári Guðjohnsen gerði sér lítið fyrir og hélt óvænta afmælisveislu fyrir konuna sína, Ragnhildi Sveinsdóttur, síðastliðið fimmtudagskvöld. Ragnhildur verður þrítug á morgun, 8. júlí, en Eiður tók forskot á sæluna og efndi til veislu í garðinum við heimili þeirra í Fossvogi.

Samkvæmt heimildum Fréttablaðsins var þar slegið upp stórri útigrillveislu með öllu tilheyrandi, en það var góðvinur Eiðs Smára, sjónvarpsmaðurinn Sverrir Sverrisson, sem sá um skipulagningu hennar.

Auk fjölskyldumeðlima afmælisbarnsins og Eiðs Smára mættu knattspyrnumennirnir Ríkharður Daðason, Birkir Kristinsson og Guðni Bergsson í veisluna. Það gerði sömuleiðis Ragna Lóa Stefánsdóttir en eiginmaður hennar, Hermann Hreiðarsson, var fjarri góðu gamni ásamt þeim Ívari Ingimarssyni og Brynjari Birni Gunnarssyni. Allir þurftu þeir að yfirgefa landið fyrir skemmstu til að sinna skyldum sínum sem atvinnumenn í boltanum.

Ekki dugði minna en helstu tónlistarmenn þjóðarinnar til þess að spila fyrir gesti. Stefán Hilmarsson, Jón Ólafsson og Björn Jörundur sáu um það við góðar undirtektir auk þess sem Hara-systur voru fengnar til þess að líta inn og syngja nokkur lög.

Boðið var upp á bæði nauta- og lambakjöt af grillinu, fínasta meðlæti, rauðvín og hvítvín. Gestir þurftu ekki að ómaka sig við að hella í glösin og bæta á diskana því í veislunni voru þjónar á hverju strái. Hófið þótti afskaplega vel lukkað og skemmtu gestir sér fram á nótt. Ekki fylgir sögunni hvort veislan hafi verið afmælisgjöf Eiðs til konunnar en það má reikna með að hún fái að minnsta kosti eitthvert smáræði á sjálfan afmælisdaginn á morgun.