Hettupeysur Klöru uppseldar

Klara Ósk Elíasdóttir hefur setið sveitt við sauma undanfarnar vikur. Hettupeysur eftir Klöru, sem flestir þekkja sem söngkonu í Nylon, eru til sölu í búðinni Fígúru á Skólavörðustíg, sem var opnuð í lok maí. Velgengni þeirra hefur verið slík að Klara annar ekki eftirspurn.

„Það hefur ekki verið til peysa í búðinni í svolítinn tíma, þær fara bara um leið og ég geri þær,“ sagði hún. „Ég hef bara verið í vandræðum með þetta. Efnið sem ég kaupi vanalega var ekki til, ég kláraði það í búðinni,“ sagði Klara, sem segir annríkið þó vera jákvætt vandamál. Hún segir efnisskortinn þó nánast hafa verið velkominn.

„Það var eiginlega ágætt að fá smá pásu þegar efnið kláraðist. Það var svona „bittersweet“. Ég gat að minnsta kosti hvílt úlnliðina aðeins,“ sagði hún og hlæjandi.

Klara hefur ekki tölu á því hversu margar peysur hún hefur saumað á síðustu vikum. „Það eru einhverjir tugir, það er ekki spurning,“ sagði hún. Nylon kemur fram í Bolungarvík í dag en hefur haft hægt um sig í sumar, svo Klara hefur getað einbeitt sér að saumunum.

„Við höfum aðeins komið við og sungið á nokkrum stöðum, en það er ekki neitt miðað við hvernig þetta hefur verið,“ sagði Klara, sem átti ekki von á að peysurnar hennar myndu rokseljast eins og raun ber vitni. „Við vorum hæfilega bjartsýn þegar við opnuðum búðina en ég gerði ekki ráð fyrir að þetta færi svona hratt af stað,“ sagði hún og hló við.