Johnsen-ættin gerir sér glaðan dag

Ættarmót njóta mikilla vinsælda meðal Íslendinga og á hverju sumri flykkjast hundruð landsmanna út á land til að hitta fjarskylda og nærskylda ættingja sína. Í Vestmannaeyjum kemur ein ætt saman um helgina sem er þekkt fyrir mikið stuð.

„Það er alltaf mikið fjör þegar fjölskyldan kemur saman. Þú getur rétt ímyndað þér,“ segir þingmaðurinn Árni Johnsen en um helgina fer fram ættarmót hjá einum legg Johnsen-ættarinnar, þeim afkomendum sem tengdir eru Suðurgarði, en þar átti einmitt afi og nafni þingmannsins heima.

Eins og sönnu Johnsen-fólki sæmir verður mikið um dýrðir á ættarmótinu og er búist við að um 150 manns muni koma saman við tilefnið. Árni segir ættarmótin ávallt vera hina mestu skemmtun og er ekki ólíklegt að þingmaðurinn grípi í gítarinn og stjórni fjöldasöng þegar líða tekur á kvöldið. „Þetta er stór og lífsglöð ætt og verður eflaust stórskemmtilegt,“ segir Árni.

Mikið er um að vera í Eyjum um helgina en þá fer fram hin svokallaða goslokahátíð og er búist við talsverðum fjölda í bænum í tilefni hennar. Félag ungra sjálfstæðismanna hefur skipulagt hópferð til Eyja þar sem búast má við því að fólk skemmti sér fram eftir nóttu og þá eru sex stórbrúðkaup fyrirhuguð í bænum um helgina, með tilheyrandi gestafjölda og hátíðarhaldi.

Lögreglan í Eyjum er í viðbragðsstöðu vegna alls þessa fjölda fólks og verður aukamaður á vakt til vonar og vara. Lögreglan segist þó ekki eiga von á því að þurfa að skipta sér af ættarmótinu, enda sé Johnsen-fólkið ljúfmenni upp til hópa.