Hermikrákan Victoria

Kate Moss er „trendsettari" eins og flestir vita en fæstir vita það þó jafnvel og Victoria Beckham sem er alls ekki þekkt fyrir sjálfstæðar tískuákvarðanir.

Fótboltaeiginkonan hefur verið ansi gjörn á að herma eftir Moss og má þá til dæmis nefna jakkafatavestin sem Kate var með þeim fyrstu til að sporta. Victoria var ekki sein að stela þeim stíl og þrammaði um allt í þröngum buxum og vesti en hún hefur aldrei farið leynt með aðdáun sína á Kate.

Aðdáunin hefur þó sjaldan verið eins augljós og þegar þær stöllur í Spice Girls kynntu endurkomu sína. Þetta var þann 28. júní en þá klæddist Victoria svörtu lífstykki og níðþröngum glansandi svörtum leggings úr gervileðri eða „pleather". Það væri sosum ekki í frásögur færandi nema vegna þess að Kate Moss klæddist nákvæmlega sömu leggings nánast alla Glastonbury-hátíðina og var mynduð í þeim þann 23. júní. Það tók Victoriu aðeins fimm daga að stela stílnum og má því segja að hún sé orðinn atvinnumanneskja í greininni.

Buxurnar eru frá nýju tískumerki að nafni Les Chiffoniers og fást í Browns í Bretlandi. Eflaust seljast þær ágætlega þessa dagana.