Með pylsuvagn í fertugsafmælinu

„Ég vildi hafa svona diskófíling í þessu,” segir Ragna Lóa Stefánsdóttir, eiginkona Hermanns Hreiðarssonar og fyrrum knattspyrnukona, um fertugsafmælið sitt sem hún fagnaði ásamt 150 gestum í hinum gyllta sal Hótel Borgar um helgina. Sérstakt hattaþema var í boðinu enda er Ragna Lóa að eigin sögn mikil áhugamanneskja um höfuðföt. Sjálf var hún í glimmersamfestingi og að sjálfsögðu með hatt í stíl. Fötin voru hönnuð af þeim Hörpu Einarsdóttur og Selmu Ragnarsdóttur.

„Ég var búin að heyra af þeim og langaði að prófa eitthvað nýtt,” segir Ragna Lóa um tildrög þess að hún fékk fyrrnefnda hönnuði í lið með sér. „Ég var mjög ánægð með útkomuna en stelpurnar hönnuðu líka diskógalla á Hemma sem var ekki síður flottur.” Aðspurð um hverjir hefðu skarað fram úr hvað höfuðföt varðar nefnir hún knattspyrnubræðurna Jóhannes Karl og Bjarna Guðjónssyni. „Þeir voru sérstaklega frumlegir og lögðu sig mikið fram,” segir Ragna en Jóhannes Karl gekk víst svo langt að líma hattinn fastan á höfuðið.

Skemmtiatriðin í boðinu voru ekki af verri endanum. „Það var fullt af stórgóðum heimatilbúnum skemmtiatriðum og ég fékk Sigríði Klingenberg til að koma og spá fyrir gestum,” segir Ragna Lóa sem hafði þó ekki tíma til að láta spá fyrir sér sjálfri. „Svo kom aldrei annað til greina en að fá Magna til að syngja. Hann er stórkostlegur skemmtikraftur enda vorum við bæði komin upp á svið með honum áður en við vissum af.” Þess má geta að Magni söng einnig í þrítugsafmæli Hermanns fyrir nokkrum árum síðan. „Hann er í miklu uppáhaldi hjá okkur hjónum.”

Það er ekki hægt að segja annað en að veitingarnar hafi verið í óvenjulegri kantinum en gestum var boðið upp á rjúkandi heitar pylsur með öllu. „Ég er ekki mikið fyrir að setjast niður og eyða tíma í að borða. Þess vegna ákvað ég að hafa bara miðnætursnarl og þar sem maðurinn minn er mikið fyrir pylsur drógum við bara pylsuvagn inn á svæðið. Þetta var heilmikil stemning.”