Kate Moss hætt með Pete Doherty

Kate Moss er flúin til Parísar eftir að hafa fengið fréttir af meintu framhjáhaldi Pete Doherty. Hin þrjátíu og þriggja ára gamla Kate er miður sín en Pete hélt víst framhjá henni með suður-afrískri fyrirsætu að nafni Lindy. Kate náði ekki í Pete í marga daga eftir að hann fór á fyllirí og sást hann kela og knúsast með hinni dökkhærðu Lindy.

„Kate er algjörlega í öngum sínum en reynir að halda andlitinu fyrir dóttur sína, Lilu Grace. Hún hefur grátið stanslaust um helgina,“ sagði heimildarmaður. „Hún hefur fengið nóg og nú er komið að því að taka erfiðar ákvarðanir um framtíð sambands þeirra.“

Ekki er langt síðan fréttist að parið hygðist gifta sig og hafa þau plön varla auðveldað Kate að sætta sig við þessar slæmu fréttir.

Breskir fjölmiðlar hafa sömuleiðis nýlega greint frá því að Moss hafi farið í megrun til að reyna að halda í Pete. Í þeim fréttum kom fram að hún væri hrædd um ásókn grúppía í kærastann. Kate mun hafa látið þau orð falla að hún væri að eldast og ætti ekki roð við ungu dömurnar. Nú virðist þó sem versti ótti hennar hafi orðið að veruleika.