Stöndum öðrum langt að baki

Tollgæslan og lögreglan á Íslandi standa hinum Norðurlöndunum nokkuð langt að baki er horft er til lagaheimilda til þess að vinna gegn skipulagðri glæpastarfsemi annars vegar, og tollaeftirlits hins vegar. Lagaheimildir lögreglu til þess að beita hinum svokölluðum forvirkum aðgerðum, sem felast í greiningarvinnu til að koma í veg fyrir afbrot, hafa á undanförnum árum víkkað á Norðurlöndunum umfram það sem hér er.

Björn Bjarnason dómsmálaráðherra segir að tekið verði á þessum hlutum í frumvarpi til laga um meðferð sakamála, sem væntanlega verður flutt á næsta þingi. „Þá gefst alþingismönnum tækifæri til þess að ræða þessi mál,“ segir Björn.

Tollgæslan hefur verið efld nokkuð en tækjabúnaður, sérstaklega tollsins í Reykjavík, stendur tollgæslum víðs vegar á Norðurlöndunum nokkuð að baki. Sérstaklega þegar horft er til gegnumlýsingarbúnaðar en þess er enn beðið að gegnumlýsingarbifreið fyrir gáma verði tekin í notkun. Hún mun stórefla eftirlitið. Þá hefur ekki enn verið komið upp gegnumlýsingarbúnaði á Seyðisfirði, þrátt fyrir ítrekaðar óskir sýslumannsins á staðnum, en vilyrði hefur þó verið gefið fyrir því að það komi innan tíðar.