Vaxandi fjárfestingartengsl við Indland

Fjármálaráðherra Indlands sér fyrir sér að viðskiptatengsl Íslands og Indlands, einkum og sér í lagi á sviði fjárfestinga, fari hraðvaxandi á næstu árum. Hann hvetur Íslendinga til að íhuga fjárfestingar í indverskum sjávarútvegi.

Indverski fjármálaráðherrann, P. Chidambaram, var staddur hér á landi í gær í boði Árna Mathiesen fjármálaráðherra til að undirrita samning um gagnkvæma vernd fjárfestinga. Báðir ráðherrar binda vonir við að samningurinn muni ýta enn undir ört vaxandi viðskiptatengsl landanna.

Chidambaram lýsir ánægju með þær fjárfestingar sem íslensk fyrirtæki hafa þegar ráðist í á Indlandi, svo sem Actavis og Sæplast. En hann ráðleggur Íslendingum að íhuga fjárfestingar í indverskum sjávarútvegi. Indland með sinni gríðarlöngu strandlengju og gjöfulu fiskimið bjóði þar upp á mikil tækifæri og íslenskur sjávarútvegur sé jú sá þróaðasti í heimi.

Spurður um mat sitt á horfunum í viðræðunum innan Heimsviðskiptastofnunarinnar, WTO, um aukið frelsi í alþjóðaviðskiptum segir ráðherrann að sökin á því að ekki hafi náðst árangur í þeim viðræðum liggi ekki hjá Indverjum né þróunarlöndunum yfirleitt.

„Það er ekki við okkur að sakast að hvorki hafi gengið né rekið í WTO-viðræðunum. Reyndar hefur Indland reynt að hafa forystu fyrir þróunarlöndunum að ná samkomulagi. En þróuðu löndin verða að gera sér grein fyrir að landbúnaður er viðkvæmt mál. Fyrir Bandaríkin og mörg lönd í Evrópu kann landbúnaður að snúast um kaupsýslu og viðskipti.

Fyrir indverska bændur er þetta spurning um lífsafkomu,“ segir ráðherrann. „Það eru um 115 milljónir fjölskyldna, um 600 milljónir manna, sem eiga afkomu sína undir landbúnaði í landinu, svo að það segir sig sjálft að við verðum að gæta þess að ganga ekki of nærri þeim atvinnuvegi.“ Þess vegna verði Vesturlönd að sjá að dragi þau ekki verulega úr niðurgreiðslum í landbúnaði, bæði til framleiðslu og útflutnings, verði ekki hægt að ná samkomulagi um alþjóðviðskipti með landbúnaðarafurðir.

Spurður um tengsl Indlands við hitt hraðhagvaxtar-risaríkið í Asíu, Kína, segir hann þau vera góð. Viðskiptin milli þeirra aukist um fimmtíu prósent á ári og nemi nú um átján milljörðum Bandaríkjadala. Báðar ríkisstjórnir séu staðráðnar í að ýta undir frekari viðskipti og láta landamæradeiluna sem þær eiga enn í ekki spilla fyrir því. Chidambaram getur þess að eins og er sé Evrópusambandið stærsti viðskiptaaðili Indlands og Bandaríkin stærsta staka viðskiptalandið. „En ég get ekki útilokað að viðskiptin við Kína muni fara fram úr öðru hvoru eða hvoru tveggja, því þau vaxa með svo miklum hraða.“