Gjörbreyttur Rex opnar í kvöld

Starfsmenn Rex hafa undanfarna daga staðið í ströngu við að breyta og bæta en komin eru þrjú ár síðan staðurinn var síðast tekinn í gegn. „Það er búið að ganga rosalega vel síðastliðin þrjú ár og staðurinn orðinn svolítið sjúsk­aður. Við ákváðum að taka hann í gegn og bara gjörbreyta um stíl,“ segir Sverrir Rafnsson, framkvæmdastjóri staðarins.

„Rauða veggfóðrið sem hefur einkennt staðinn verður rifið niður, ný gólf sett og ný húsgögn. Svörtu gluggatjöldunum verður skipt út fyrir hvít, rókókóstíllinn fær að fjúka og víkur fyrir ljósara og léttara yfirbragði,“ segir Sverrir en honum til aðstoðar við breytingar er Guðlaug Halldórsdóttir í Má Mí Mó.

Auk breytinganna hefur staðurinn komist yfir glænýja Heineken-græju sem kælir bjórinn niður í eina gráðu. „Við erum fimmti staðurinn í Evrópu sem býður upp á þessa græju. Þetta virkar þannig að bjórinn er framleiddur í frosnum glösum og kemur því alveg ísjökulkaldur út úr dælunni. Auk þess hyggjumst við opna staðinn á fimmtudögum en það höfum við ekki gert hingað til,“ sagði Sverrir en á nýbreyttum Rex verður einnig glæsileg aðstaða fyrir reykingafólkið úti í porti. Í kvöld verður svo haldið opnunarpartí sem hefst klukkan níu. Boðið verður upp á veitingar og drykki.