Kúrekar hertaka netið

„Það er mjög gaman að þessu enda er verið að hlusta á þetta alls staðar í heiminum; Kína, Belgíu, Danmörku og svona mætti lengi telja,“ segir Hallbjörn Hjartarson en framtak hans og félaga hjá Útvarpi Kántrýbæ um að setja dagskrána á netið hefur mælst ótrúlega vel fyrir.

Talið er að yfir fimm hundruð manns hlusti reglulega á útsendingarnar en samkvæmt vefsíðunni kantry.is eru á milli 900 og 1.000 flettingar á síðunni.

Útvarpi Kántrýbæ var lokað í enda febrúar á þessu ári vegna fjárhagsvandræða en ekki var þá loku fyrir það skotið að það yrði opnað aftur. Og Hallbjörn var ekki lengi aftur upp á afturfæturna því í maí tilkynnti hann að útvarpið væri aftur opið og þá á netinu.

Hallbjörn var hins vegar ekki par sáttur með þá þjónustu Símans því síðan væri oft og iðulega að frjósa og það ylli nokkrum vandkvæðum við útsendingar. „Ég hellti mér nú yfir þá bara áðan og þeir lofuðu að koma og gera við þetta. Þetta gengur náttúrlega ekki enda er ég búinn að borga fullt verð fyrir þetta,“ segir Hallbjörn sem var að vonum sáttur með vinsældirnar.

Hallbjörn segir að hann fái nú ekki mikið af tölvupósti í gegnum netið en þó. Hann kjósi hins vegar ekki að svara erlendum pósti. „Hins vegar er gaman að við kúrekarnir skulum vera hertaka netið,“ bætti hann við og kynnti inn næsta lag.