Fær greiddar bætur

Sátt hefur náðst í máli sem Victoria Beckham höfðaði gegn slúðurblaðinu Star. Kryddpían fær greiddar bætur og birt verður afsökunarbeiðni.

Málið snýst um frétt sem Star Magazine birti um vandamál við gerð raunveruleikaþáttar um flutning Beckham-hjónanna til Bandaríkjanna.

Haft var eftir heimildarmanni að þátturinn væri fíaskó enda væri Victoria bæði köld og sjálfumglöð. „Hún gengur um og sýnir öllum lítilsvirðingu. Heldur að hún sé voðalega stórt nafn en síðan veit hvorki kóngur né prestur hver hún er," hafði Star eftir heimildarmanni sínum.

Lögfræðingur Victoriu , Gerrard Tyrell, sýndi fram á það fyrir dómstólum í London að fréttin væri bæði röng og meiðandi fyrir frú Beckham. Þættirnir hefðu ekki verið farnir í framleiðslu þegar fréttin var skrifuð og því hefðu þessir hlutir aldrei getað átt sér stað. „Hún er algjörlega röng og kemur sér illa fyrir Victoriu," sagði Tyrell við réttarhöldin og bætti því við að blaðið hefði aldrei haft samband við Victoriu við gerð fréttarinnar.

Útgefendur blaðsins viðurkenndu mistök sín og lofuðu að birta formlega afsökun vegna fréttarinnar auk þess sem þeir greiða Victoriu skaðabætur. Victoria komst þó á forsíður blaðanna þrátt fyrir þennan úrskurð því breska blaðið The Sun hélt því fram að söngkonan myndi koma fram á leikjum LA Galaxy, liðsins sem David Beckham spilar með, sem klappstýra.