Kvikmynd um Hugh Hefner

Til stendur að gera kvikmynd um Hugh Hefner, stofnanda karlatímaritsins Playboy. Leikstjóri verður Brett Ratner sem á að baki Rush Hour-myndirnar og X-Men: The Last Stand.

Hefner, sem er 81 árs, seldi kvikmyndaréttinn að ævi sinni fyrir nokkrum árum. Hefur hann lagt blessun sína yfir hugmyndir Ratner og félaga um gerð myndarinnar. „Hefner var alinn upp af bókstafstrúarfólki en varð á endanum guðfaðir kynlífsbyltingarinnar,“ sagði Ratner. „Hann braut óskrifaðar reglur, sérstaklega hvað kynlífshegðun varðar. Ég vil sýna allt saman, allt frá baráttu hans fyrir málfrelsi sínu, til fyrstu orgíu hans, til hjartaáfallsins sem hann fékk á níunda áratugnum sem varð honum næstum að bana.“

Hefner stofnaði Playboy árið 1953 og gerði tímaritið fljótt gríðarlega vinsælt. Barðist hann á síðum þess fyrir málfrelsi og gegn hvers kyns ritskoðun.