Ósátt við móður sína

Britney Spears virðist vera eitthvað ósátt við móður sína og íhugar nú að sækja um nálgunarbann á hana. Britney heimsótti víst lögfræðing sinn fyrr í vikunni til þess að spyrjast fyrir um bannið en þá yrði Lynne, móður Britneys, bannað að nálgast börn dóttur sinnar.

Samkvæmt heimildarmönnum var stjarnan víst afar reið móður sinni fyrir að senda sig í meðferð vegna áfengisfíknar sinnar og þunglyndis. Lynne stóð svo víst með fyrrverandi eiginmanni Britneys, Kevin Federline, þegar parið átti í forræðisdeilum yfir sonum þeirra, Sean Preston og Jayden James. Lynne vill þó ekkert kannast við þetta og segir samband hennar við dóttur sína vera mjög ástríkt.

„Það er mjög sorglegt að allur heimurinn þurfi að fylgjast með henni þegar hún gerir mistök sem við öll gerum einhvern tíma á ævinni. Britney er umhyggjusömust og ástríkust af mínum börnum. Hún er bara að átta sig á lífinu,“ sagði móðir Britneys.