Eyþór í það heilaga

Eyþór Arnalds hyggst ganga að eiga unnustu sína, Dagmar Unu Ólafsdóttur, í Selfosskirkju laugardaginn þrítugasta júní. Þetta staðfesti Eyþór í samtali við Fréttablaðið en vildi að öðru leyti lítið láta hafa eftir sér. „Við viljum ekkert vera að auglýsa þetta,“ sagði Eyþór.

Þau ættu þó að vera hæg heimatökin hjá bæjarstjórnarfulltrúanum því hann hefur verið ráðinn meðhjálpari sr. Gunnars Björnssonar í kirkjunni. Eyþór vildi ekkert segja til um hvort hann ætlaði að velta sér upp úr dögginni í tilefni af sumarsólstöðum en sagðist hafa heimildir fyrir því að slíkt tíðkaðist meðal nokkurra íbúa á Eyrarbakka. „Og þeir koma víst endurnærðir til baka,“ sagði Eyþór.

Fastlega má gera ráð fyrir því að fjöldi góðri gesta leggi leið sína austur fyrir fjall til að samgleðjast með hinum nýgiftu og samkvæmt heimildum Fréttablaðsins eru meiri líkur en minni á því að hljómsveitin Todmobile taki eitt eða tvö lög í tilefni dagsins.

Eyþór og Dagmar hafa komið sér vel fyrir á bænum Hreiðurborg í sveitarfélaginu Árborg. Á vefsíðu Mannlífs má jafnframt lesa um að þau eru með nýtt og glæsilegt hús í byggingu í Búgarðabyggð skammt frá Selfossi.