Ferðamenn fara úr hvalaskoðun í hvalkjötsát

„Þeir koma hér til mín og gleypa þetta í sig alveg hreint," segir Kjartan Halldórsson sem rekur veitingastaðinn Sægreifann við Reykjavíkurhöfn. Hann segir það daglegt brauð að erlendir ferðamenn komi til hans að smakka hvalkjöt eftir að hafa farið í hvalaskoðun. „Þeir fara út að skoða hvalina og svo blæs hvalurinn framan í þá og þá koma þeir gráðugir til mín að borða," segir sægreifinn og hlær.

Einar Steinþórsson hjá hvalaskoðunarskipinu Hafsúlunni segist ekki verða mikið var við að fólk fari úr ferðunum hjá honum að borða hval. „Meiri hluti þeirra útlendinga sem ég tala við í skoðunarferðunum eru mjög mótfallnir hvalveiðunum. Sérstaklega Bretar, Bandaríkjamenn og Norðurlandabúar sem koma hingað."

Einar segir að margir spyrji út í hvalveiðarnar en það fari þó eftir því hversu áberandi veiðarnar hafi verið í umræðunni hversu mikið er spurt. „Ég er hræddur um að það eigi ekki eftir að hafa góð áhrif þegar Paul Watson kemur," segir Einar en Paul Watson er, eins og kunnugt er, forsvarsmaður Sea Shepard dýraverndunarsamtakanna sem sökktu tveimur hvalveiðiskipum við Reykjavíkurhöfn árið 1986.

Einar segist einnig heyra af vanþóknun fólks í gegnum ferðaskrifstofur. Í haust þegar langreyðaveiðarnar voru áberandi í fjölmiðlum hafi ferðamenn mikið talað um að þetta væri þeim ekki að skapi. Hann segist reyndar ekki vita um afbókanir vegna þessa.

Einar segist þó hafa smakkað hval og finnst þetta ágætis matur þegar hann er rétt matreiddur án þess þó að hann myndi kaupa hvalkjöt sjálfur.

Kjartan í Sægreifanum segir að ferðamönnunum sem komi til hans finnist ekkert að því að borða hval. „Það er bara einstaka manneskja sem er foj og hleypur út. Það er viðburður þegar það gerist."