VR skoðar mál FL Media

„Við reiknum með því að fá reikningana frá Rottweiler í dag og þá munum við fara yfir málin,“ segir Ómar Vilhelmsson, framkvæmdarstjóri Flass.net. Fréttablaðið hefur að undanförnu fjallað um meintar vanefndir viðburðarfyrirtækisins FL Media hvað launamál varðar í kjölfar þess að rapphljómsveitin XXX Rottweiler setti upp heimasíðuna oskaraxelskuldarpening.blogspot.com.

Málið snýr að þrennum tónleikum sænska plötusnúðsins Basshunter í nóvember sem Rottweiler segjast ekki hafa fengið greitt fyrir. Þegar Ómar hafði fengið ljósrit af reikningunum seinnipartinn í gær kannaðist hann við hluta þeirra en alls ekki alla. Í tölvupósti til Fréttablaðsins frá Ómari stóð: „Sá aðili sem samdi við hljómsveitina á sínum tíma þarf að afgreiða reikninga og kvitta fyrir þeim, ef þeir reynast réttir, [hann] er erlendis og kemur ekki til landsins fyrr en 28. júní.

Ef þeir reynast réttir munu eftirstöður þeirra vera greiddar, ef þeir hinsvegar reynast ekki í samræmi við það sem um var samið á sínum tíma verðum þeim mótmælt. “ Sá aðili sem um ræðir mun vera Óskar Axel Óskarsson, markaðsstjóri FL Media. Erpur Eyvindarson greindi Fréttablaðinu frá því að fjórmenningarnir í Rottweiler hafi sent FL Media reikninga dagana 16.-26.nóvember. Þeir hafi hins vegar ekki verið greiddir nema að hluta. „Ég hef sjálfur fengið greiddan minn hluta en hinir þrír hafa ekki fengið neitt,“ segir Erpur.

Ómar sagði í samtali við blaðið að laun fyrrum tónlistarstjóra stöðvarinnar, Magnúsar Árna Gunnarssonar, yrðu greidd en gat ekki tjáð sig um í hvaða farvegi mál fyrrum viðburðarstjórans, Carmen Jóhennsdóttur væri. Hjá VR fengust þær upplýsingar hjá Elías Magnússyni, forstöðumanni Kjarasviðs, að einhverjir aðilar hefðu haft samband og óskað eftir aðstoð sökum vangoldinna launa af hendi FL Media. Elías vildi ekki gefa upp hversu margir þeir væru.