Ástæða fiskidauða súrefnisskortur

Niðurstöður rannsókna starfsmanna Hafrannsóknarstofnunar benda til þess að ástæða fiskidauða í Grundarfirði í síðustu viku hafi verið súrefnisskortur.

Nokkuð af eldisþorsk drapst í kvíum í firðinum í síðustu viku. Starfsmenn Hafrannsóknarstofnunar hafa rannsakað fiskidauðann og telja þeir að mikið magn af síld í firðinum hafi orsakað lágt súrefnisinnihald sjávar og valdið því að þorskurinn í kvínni drapst. Fyrirbrigði sem þetta er þekkt í norskum fjörðum þar sem vetursetustöðvar norsk-íslensku síldarinnar eru. Rannsóknir erlendis frá sýna að síld getur lifað við lægra súrefnisinnihald sjávar miðað við þorskfiska.