Rætt um ábyrgð félagsmálaráðherra í Byrgismálinu

Byrgismálið er á ábyrgð Magnúsar Stefánssonar, félagsmálaráðherra, hvernig sem á það er horft. Þetta sagði Steingrímur J. Sigfússon, formaður Vinstri-grænna, þegar rætt var um málefni Byrgisins á Alþingi í dag. Steingrímur sagði málið mikið áfall þar sem meðferð fjármuna var í ólestri árum saman undir nefinu á Alþingi, félagsmálaráðuneytinu og fleiri aðila.

Jón Sigurðsson, formaður Framsóknarflokksins, var til svara fyrir Magnús Stefánsson, félagasmálaráðherra, sem er veðurtepptur erlendis. Jón sagði Magnús ekki hafa skorast undan ábyrgð og hafa brugðist við.

Birkir Jón Jónsson, þingmaður og formaður fjárlaganefndar, kom töluvert að málinu bæði þegar hann vann í félagsmálaráðuneytinu og sem formaður fjárlaganefndar. Birkir sagði marga bera ábyrgð í málinu og hann að hluta en um röð mistaka hefði verið að ræða. Fjárlaganefnd myndi nú taka málið föstum tökum.