Rektor hélt að um æfingu væri að ræða

Margir áhorfendur kvöldfrétta RÚV í fyrrakvöld ráku upp stór augu þegar þeir urðu vitni að afar undarlegri hegðun Kristínar Ingólfsdóttur, rektors Háskóla Íslands, í beinu sjónvarpsviðtali.

Verið var að spyrja Kristínu út í nýútkomna skýrslu Ríkisendurskoðunar og var rektor sífellt að laga á sér hárið auk þess sem hún beinlínis hló að spurningum fréttamannsins Rakelar Þorbergsdóttur,.

Ýmsar tilgátur heyrðust á kaffistofum og bloggsíðum landsins í gær um hvað hefði verið að hrjá rektor í viðtalinu, meðal annars að Kristín hefði fengið flugu í augað.

Hið rétta er að rektor stóð í þeirri trú að um æfingu væri að ræða. „Og ég áttaði mig ekki á því fyrr en viðtalið var búið að svo var ekki. Þetta var einfaldlega miskilningur og það láðist að láta mig fá merki um að við værum í loftinu. Og nei, þetta var ekki fluga. Ég var bara að laga mig til,“ sagði Kristín og skellihló þegar hún útskýrði málið fyrir Fréttablaðinu í gær.

„Þetta hefur verið mikið skemmtiefni hér í skólanum í dag og það er búið að gera mikið grín að mér.“ Líkt og rektor gat Rakel leyft sér að sjá spaugilegu hliðina á uppákomunni í gær. „Ég er búin að vera hjá Rúv í 8 ár og aldrei lent í öðru eins,“ sagði Rakel ennþá í sjokki. „Henni brá eðlilega mikið þegar ég sagði henni að við hefðum verið í beinni en hún tók þessu alveg frábærlega vel. Við gátum allavega hlegið mikið að þessu.“