Opnar húðflúrstofu á Ísafirði

„Myndlist er aðaláhugamálið mitt og ég hef verið að hanna tattú fyrir fólk í nokkur ár. En mig vantaði alltaf pening til að fara í myndlistarskóla svo ég dreif mig í húðflúrsnám í Bandaríkjunum. Ég er í raun að skapa mér atvinnu í myndlist,” segir Málfríður Sigrúnardóttir sem ætlar innan skamms að opna húðflúrstofu á Ísafirði.

Málfríður, sem er tvítug, lærði í World Only Tattoo School í Detroit. „Fólk verður að hafa myndlistarbakgrunn til að komast inn í skólann því þar er ekki kennt að teikna. Ég hafði þann bakgrunn en lærði svo allt um það sem snýr að vélinni, hreinlætis- og heilbrigðismálum.”

Þótt Málfríður ætli sér ekki að opna húðflúrstofuna fyrr en um miðjan mánuðinn eru pantanir þegar farnar að streyma inn. „Það er fólk á öllum aldri sem er að panta tíma, allt frá sextán ára aldri og upp í sextugt. Það er nóg að gera í þessu hér, það vantar ekkert upp á það.”