Svefndrukkinn Ari Matt klessti bílinn

„Ég var búinn að vera vakandi alla nóttina og var á leiðinni í vinnuna. Kom út af mölinni og á malbik en gerði mér enga grein fyrir hálkunni og keyrði út af," segir Ari Matthíasson, framkvæmdastjóri SÁÁ. En hann varð fyrir því óláni að keyra Renault-bifreið út af skammt frá Kaldárseli. Bíllinn var allur beyglaður og brotinn en Ara varð ekki meint af. Hann gat keyrt bifreiðina í bæinn þar sem hún bíður nú viðgerðar.

Ari var að leika í kynningarmyndinni Örstutt jól sem er ætlað að kynna og afla fjár fyrir kvikmyndina Rauð jól sem á að vera fyrsta íslenska splatter-myndin. Ari leikur Gylfa meðferðarfulltrúa sem fer með hóp ungmenna á heimili yfir jólin en þau eiga það öll sameiginlegt að hafa átt í erfiðleikum með áfengi og fíkniefni. Og ferðin er hugsuð til að halda þeim frá Bakkusi og bullinu yfir hátíðirnar. „En þau hitta því miður á röng jól," segir Ari en í myndinni eru leikarar aflimaðir, afhausaðir og bókstaflega rifnir á hol. „Það var því mikið blóðgos þarna um helgina," bætir Ari við. Tökustaðurinn kann að koma mörgum spánskt fyrir sjónir, sjálfar sumarbúðir KFUM og K þar sem boðskapur séra Friðriks Friðrikssonar um náungakærleik er í hávegum hafður.

Árni og Ari eru því orðnir nokkuð gott teymi því nýlega vann Icelandair-auglýsingin verðlaun sem besta sjónvarpsauglýsing ársins á árlegri uppskeruhátíð ÍMARK. Árni leikstýrði henni en Ari var, eins og margir eflaust muna, ákaflega eftirminnilegur í hlutverki dagdrauma-náungans. „Já, kannski að maður verði alltaf fyrsti valkostur hjá honum ," segir Ari.