Britney að brotna í meðferðinni

Veröld Britney Spears virðist að hruni komin. Tilraun poppprinsessunnar til að koma röð og reglu á líf sitt á meðferðarheimilinu Promises í Malibu virðist vera að fara út um þúfur og fjölskylda hennar hefur miklar áhyggjur af líðan hennar. Þetta upplýsir bandaríska glanstímaritið Us Weekly og hefur eftir nánum vinum Spears-fjölskyldunnar að hún óttist að Britney muni ekki halda út meðferðartímann.

Að sögn heimildarmanna blaðsins virðist hún strax vera orðin nokkuð óróleg á meðferðarheimilinu og greip fjölskyldan meðal annars til þess bragðs að fá frænda hennar, Alli, til að gista hjá henni á föstudaginn. Hann heimsótti hana síðan bæði laugardag og sunnudag. Hin 25 ára gamla Spears hefur ekki farið út af meðferðarheimilinu síðan á fimmtudag þegar hún kom við hjá vinkonu sinni og náði í föt sem hún hafði keypt á netinu.

Breska götublaðið The Sun greindi frá því í gær að Britney hefði eytt tæplega tvö hundruð þúsund krónum í föt á netinu og að aðstoðarmenn hennar hefðu sótt þau í verslun. Spears ætti því að geta klætt sig upp í meðferðinni.

Britney Spears skráði sig í meðferð á Promises-heimilinu í lok síðasta mánaðar eftir að hafa látið sig hverfa í tvígang af meðferðarheimilum. Fjölmiðlar beggja vegna Atlantshafsins hafa fylgst grannt með Spears og hegðan hennar og um helgina greindi News of the World frá hótunum söngkonunnar um að svipta sig lífi. Þá hafa sögusagnir verið á kreiki um að hún og fyrrverandi eiginmaðurinn Kevin Federline hafi í hyggju að endurnýja brúðkaupsheitin eftir frekar harkalegan skilnað.