Óvænt endurkoma Simma í handboltann

„Ég gat varla staðið í fæturna eftir leikinn og Hjálmar bróðir var rúmliggjandi," segir Sigmar Vilhjálmsson. Hann lék síðasta leikinn með meistaraflokki Hattar frá Egilsstöðum í fyrstu deild Íslandsmótsins í handknattleik á dögunum, ásamt bróður sínum Hjálmari Vilhjálmssyni.

Hattarmenn höfðu ekki riðið feitum hesti frá viðureignum sínum í deildinni, höfðu tapað öllum leikjunum og brugðu því á það ráð að fá bræðurna Sigmar og Hjálmar til aðstoðar við að innbyrða fyrsta sigurinn. Og það tókst. Höttur vann Gróttu með 31 marki gegn 28 úti á Seltjarnarnesi.

„Ég skoraði þrjú og var rekinn út af í tvær mínútur tvisvar sinnum," segir Sigmar en á héraðsvefnum austurlandid.is kemur fram að þeim Hjálmari og Sigmari hafi verið falið að fylla upp í götin á varnarleik liðsins.

Sigmar er reyndar alls ekki ókunnur parkettinu og harpixinu því hann hefur meðal annars afrekað að komast í hópinn hjá 16 ára landsliði Svía. „En svo flutti ég heim og fór að æfa með Hetti. Og þar stöðnuðu hæfileikarnir," segir Sigmar sem þó lék einnig með yngri flokkum ÍR og Vals.

Hann segir leikinn hins vegar ekki hafa vakið gamla handboltadrauma. „Keppnisskapið er einfaldlega oft meira en líkamlegt form og þó ég fari í World Class á hverjum degi þá er það allt öðruvísi en að berjast inni á vellinum," segir Sigmar og bætir því við að hann hafi fundið fyrir vöðvum sem hann vissi ekki að væru til. „En eflaust mun ég láta mig hafa það að taka einn eða tvo leiki með liðinu á næsta ári," bætir varnarjaxlinn Sigmar við.