Eldar fyrir O.J. Simpson og Orlando Bloom

Bók Völundar Snæs Völundarsonar, Delicious Iceland, hlaut nýverið hinn virtu The Gourmet Cookbook Awards sem veitt eru í Kína. Verðlaunin þykja með þeim stærstu í matarbókarheiminum. Hlaut hinn virti kokkur Jamie Oliver þau fyrir nokkrum árum auk þess sem einkakokkur sjónvarpsdrottningarinnar Opruh Winfrey var sæmdur sömu nafnbót.

Verið er að þýða verðlaunabókina yfir á íslensku og kemur hún því Íslendingum fyrir sjónir í fyrsta sinn innan tíðar.

Völli, eins og kokkurinn er jafnan kallaður, er auk þess að opna glænýjan veitingastað á Bahamaeyjum en hann hefur notið dyggrar aðstoðar konu sinnar, leikkonunnar góðkunnu Þóru Sigurðardóttur, við að hanna hann að innan. Og Völli hefur í hyggju að koma tveimur veitingastöðum til viðbótar á legg. Þau hjónin eru stórhuga og ekki verður séð að þau séu væntanleg til Íslands í nánustu framtíð. Enda eru ævintýrin rétt handan við hornið hjá þeim skötuhjúum.

„O.J. Simpson er góðkunningi minn en hann dvelst mikið á eyjunni. Hann er orðinn nokkuð gamall og lúinn verður að segjast, en hann er fínn kall,“ segir Völli í forvitnilegu viðtali við Fréttablaðið á morgun. Í viðtalinu kemur auk þess fram að Völli hefur eldað fyrir Orlando Bloom, sem er hvað kunnastur fyrir leik sinn úr Pirates of the Caribbean og Hringadróttinssögu, og þáverandi unnustu hans Kate Bosworth.

Leikarar úr sjóræningjamyndinni voru reglulega í mat á veitingastað Völla meðan á tökunum stóð. Þá eru stórstjörnur á borð við Geoffrey Rush og Gene Hackmann reglulegir gestir hjá veitingastað Völla í Karíbahafinu.