Á nærbuxum á veitingahúsi

Vandræðalegasta augnablikið? Þegar ég bjó í Tryggvagötu fór ég eitt sinn á nærbuxunum með ruslið í ruslaopið. Það vildi ekki betur til en svo að í vindhviðu skelltist hurðin að íbúðinni minni aftur og á nærbuxunum varð ég að fara inn á Jónatan Livingston máv til að fá að hringja á lásasmið.

Eftirlætisborg? Reykjavík. Lítil og þægileg borg með litlum vegalengdum svo það tekur stutta stund að sinna útréttingum sínum.

Gáfulegustu orð sem þú hefur heyrt? Orka er massi sinnum ljóshraði í öðru veldi.

Hvaða íslensku tónlistarmenn finnst þér standa fremstir í dag? Blúsararnir á Blúshátíð.

Ef þú yrðir að vera einhver önnur fræg manneskja í einn dag, hver myndirðu vilja vera?

Alla vega myndi ég ekki vilja vera Bubbi Morthens. Aftur á móti væri ég vel til í að taka eina umferð í golfi sem Tiger Woods og sigra bróður minn.

Trúir þú á drauma? Já, ég hef trú á draumum mínum, jafnt í svefni sem vöku. Draumarnir rætast stundum og það er lífsnauðsyn að eiga drauma.

Í hvaða stjörnumerki ertu? Sporðdrekanum. Ég held að ég hafi þær dulrænu orkulindir sem sporðdrekinn er sagður hafa.

Hver er þín mesta nautn? Algjörlega óprent­hæft.

Hver er þín fyrsta minning? Einhverjar stelpur, vinkonur systur minnar, kíkjandi inn í vagninn segjandi: „Guð hvað hann er sætur.“

Hver er þinn fararskjóti? Tveir jafnfljótir.

Hvert er þitt eftirlætisdýr? Blettatígur heillar. Hann er svo fallegur og ég hef verið svo heppinn að sjá þetta hraðskreiðasta dýr jarðar hlaupa í Afríku.

Yfir hverju hefurðu mestar áhyggjur í augnablikinu? Ég týndi einni aðalstjörnu Blúshátíðar, Zoru Young, en fann hana rétt áðan í Boston. Hún flýgur hingað í fyrramálið (miðvikudag 4. apríl).

Hvað finnst þér það ofmetnasta í íslensku samfélagi? Meint álit Íslendinganna á sjálfum sér; að þeir séu stórkostlegir.

Hvaða kæki ertu með? Engir kækir.

Hvað er það besta sem þú hefur bragðað um ævina? Hangikjötið á jólunum með strákunum mínum.

Hvað er það sem blúsinn gerir fyrir þig?

Hann hefur gert margt fyrir mig í gegnum tíðina. Ég hef kynnst alls kyns fólki og öðrum löndum og lært margt um lífið og tilveruna. Síðast en ekki síst hefur hann gert mig að betri manni.

Undir hvaða aðstæðum er best að syngja? Þegar andinn kemur yfir mann. Stundum koma lögin einfaldlega til manns þegar maður sest niður með gítarinn. Streyma þá fram líkt og skrúfað sé frá krana.

Af hverju blúshátíð? Ég tel að hver einasta höfuðborg með vott af sjálfsvirðingu eigi að halda alvöru blúshátíð og fyrir nokkrum árum var það markmið að koma alvöru blúshátíð á fót sem Íslendingar gætu verið stoltir af og það tókst. Hér áður fyrr var dymbilvika ein leiðinlegasta og drungalegasta vika ársins en okkur blúsurum hefur tekist að snúa því við og bætt þannig mannlífið.

Er til eitthvað sem heitir íslenskur blús? Já. Íslendingar eru blúsarar norðursins frá fornu fari. Kváðu rímur til að halda á sér hita, sem er ekkert annað en blús. Þurfum ekki annað en að minnast vísunnar „Yfir kaldan eyðisand“.