Árni fjármálaráðherra varð af 150 milljónum

Við sameiningu SPH og SPV hefur stofnfjárhlutur SPH nú fjórfaldast. Hlutur sem seldur var á 50 milljónir fyrir ári er nú metinn á 200 milljónir.

"Ég sagði við sjálfan mig og aðra: Fyrst allir snillingar landsins þyrpast til Hafnarfjarðar og vilja kaupa þá er best að bíða og sjá. Ég fékk þetta á silfurfati eins og aðrir og mér lá ekkert á," segir Helgi Vilhjálmsson athafnamaður í Hafnarfirði kenndur í Góu. Og hrósar nú happi.

Við sameiningu Sparisjóðs Hafnarfjarðar (SPH) og Sparisjóðs vélstjóra nýverið fjórfaldaðist stofnfjárhlutur hvers um sig. Mikið var um það fjallað í fréttum fyrir ári að kaupsýslumenn ýmsir, undir forystu lögmannsins Sigurðar G. Guðjónssonar, ásældust stofnfjárhlut sem þröngur hópur ábyrgðarmanna SPH eða tæplega fimmtíu, sem breyttist óvænt í stofnfjáreigendur með lagabreytingum um fjármálastofnanir, átti. Stofnfjáreigendurnir, sem flestir höfðu verið handvaldir í hópinn af Matthíasi Á. Mathiesen eða komið inn í tengslum við bæjarstjórnarsetu sína, áttu skyndilega hlut sem metinn var á 50 milljónir. Og gátu margir ekki beðið þess að selja og stinga peningunum í eigin vasa.

Reyndar hefur Fréttablaðið heimildir fyrir því að hluturinn hafi eitthvað hækkað frá fimmtíu milljónum enda ásælnin mikil " þeir sem vildu kaupa sáu þarna fram á skjótfenginn og auðveldan gróða. Einn hlutur hvers um sig samanstóð af tveimur bréfum er nú, ári síðar, metinn á tvöhundruð milljónir. Munar um minna. Þeim sem lá svo á að selja urðu þannig af 150 milljónum á einu ári.

"Þeir hljóta að fara að gráta. Greinilega ekki eins miklir fjármálamenn og ég sem ætla að bjóða þeim upp á kók og hraun. Ég er búinn að ávaxta vel mitt pund. En þeir verða að bíta í þetta súra epli. Þeir héldu ekki vatni. Þeim lá svo á sumum," segir Helgi.

Ljóst er að kaupsýslumenn á borð við Magnús Ármann, Sigurð Bollason, Björn Þorra Viktorsson, Jón Pálmason, Pálmi Haraldsson og margir fleiri hafa þarna hagnast verulega með lítilli fyrirhöfn. Fáeinir stofnfjáreigendur SPH hafa reyndar ekki selt sem eftir sitja líkt og Helgi: Matthías Á. Matthiesen, Trausti O. Lárusson, Ingólfur Flygenring, Þórður Magnússon og Páll Pálsson eru meðal þeirra sem ekki seldu og prísa sig nú líklega sæla.

Hins vegar eru margir þekktir Hafnfirðingar sem seldu og eiga nú von á kóki og hraun frá Helga í sárabætur: Þór Gunnarsson, Ingimar Haraldsson, Sigurbergur Sveinsson, Sigurður Þórðarson, Gissur Guðmundsson, Ingvar Viktorsson, Finnur Árnason og Árni Grétar Finnsson eru þeirra á meðal sem og fjármálaráðherra sjálfur Árni Mathiesen.

"Ég var búinn að lofa því að nota þessar 50 milljónir í eitthvað gott. Nú er ég búinn að fá góða vexti og get kannski tekið eitthvað fyrir sjálfan mig. Mér fannst illa farið með Matta [Matthías. Á.] og er ánægður með að hann fái eitthvað. Menn sviku hann. Því þetta var eftirsótt fyrirtæki. Og þá hafa menn verið að gera eitthvað rétt. Hvað segir Árni Matt?" spyr Helgi.

Fjármálaráðherra segist ekki aðili málsins og sé ekki til umræðu um það.

"Ég fór þarna út vegna þess að ég taldi að það gengi ekki stöðu minnar vegna að vera þarna inni. Passaði mér ekki. Breytir engu þó ég hafi orðið af peningum vegna þess. Þetta snérist aldrei um peninga," segir Árni Mathiesen.