Nýr íslenskur stefnumótavefur

Rannveig Guðlaugsdóttir opnaði stefnumótavefinn förunauturinn.is í síðustu viku. „Þetta eru námskeið í samskiptum kynjanna og táknmáli líkamans. Í þá hópa er sem sagt valið út frá spurningalistum sem fólk fyllir út á síðunni, sem að sálfræðingur gerði fyrir mig,“ segir Rannveig.

Út frá svörunum flokkar hún fólk sem hún telur að eigi eitthvað sameiginlegt saman í hópa. Stuttu eftir námskeiðið, sem tekur eina kvöldstund, fer Rannveig því næst með tvo hópa saman í dagsferð. „Ég verð þá búin að grisja þannig úr spurningalistanum að þeir sem eru í þessum tveim hópum eiga eftir að geta tengst,“ útskýrði hún.

Förunauturinn sker sig þannig töluvert úr hópi annarra stefnumótasíða, þar sem Rannveig er alltaf nálæg, og getur þannig hjálpað til að brjóta ísinn. Hún segir þó áríðandi að fleiri karlmenn skrái sig til leiks. „Það gerist náttúrulega ekkert nema herramennirnir skrái sig líka,“ sagði hún.

Rannveig segist sjálf vera í sömu sporum og framtíða kúnnar. „Ég er búin að vera á markaðnum í rúm fjögur ár. Ég hef verið að bíða eftir því að einhver gerði þetta, en svo varð ég bara að gera þetta sjálf. Markaðurinn á Íslandi er einhleypum alveg ofboðslega erfiður,“ bætti hún við.