Kringlan verður undirlögð hefilbekkjum, hárblásurum og heftibyssum í dag, þar sem hún hýsir Íslandsmót iðnnema. 75 keppendur frá tólf skólum keppa í ellefu iðngreinum. „Þetta er þriðja árið sem Íslandsmótið er haldið með þessum hætti, í verslunarmiðstöð. Það er gert með það fyrir augum að leyfa almenningi að njóta þess betur. Áður var það haldið inni í skólunum," sagði Gyða Dröfn Tryggvadóttir hjá Mennt, sem sér um skipulagningu mótsins í þriðja sinn í ár.
Keppnin fer fram á Degi iðn- og starfsmenntunar, en þetta er annað árið í röð sem sá dagur er í heiðri hafður. „Þetta á eftir að byggja meira upp og gera sýnilegra," sagði Gyða. Markmið dagsins er einmitt að kynna iðngreinar, gera þær sýnilegri og bæta ímynd þeirra. „Það hefur heilmikið gerst og breyst á síðustu árum. Það hefur líka þurft að bæta ímynd greinanna og þetta er einn liður í því. Enn er mikil áhersla á bóknám, svo það þarf að vekja frekari athygli á iðn- og starfsnámi," sagði hún.
Keppendur á Íslandsmótinu eru undir 22 ára aldri og keppa í jafn fjölbreyttum greinum og málmsmíði, málun, hársnyrtingu, grafískri miðlun og ljósmyndun, svo eitthvað sé nefnt. „Grafísk miðlun og ljósmyndun eru nýjar greinar frá því í fyrra. Keppendur í þeim verða saman í liði og verður falið að hanna plakat. Ljósmyndarinn tekur myndir og miðlarinn á að setja plakatið upp," útskýrði Gyða.
Grafísk miðlun er jafnframt dæmi um þá þróun sem hefur átt sér stað innan iðnnámsins. „Greinarnar þróast og breytast. Grafísk miðlun hét prentsmíð áður, en í henni voru ekki notaðar tölvur. Þetta breytist allt með tilkomu nýrrar tækni," sagði Gyða.
Keppni lýkur klukkan fjögur í dag. Klukkan 17.30 mun Sveinn Hannesson, framkvæmdastjóri Samtaka iðnaðarins, afhenda sigurvegurum verðlaun sín. Kynnir er Gunnlaugur Helgason útvarpsmaður.
