Býður upp á augnhimnulestur

"Ég kenndi þeim að daðra, klæðast og snyrta sig. Öll þessi helstu atriði sem þarf til að gera allt vitlaust," segir Heiðar Jónsson snyrtir, sem þótti fara á kostum í orlofsferð húnvetnskra húsmæðra fyrir skemmstu.

Þær húnvetnsku skelltu sér á mölina þar sem þær sáu Tinu Turner-sýninguna á Broadway. Fyrir slíka skemmtun er betra að vera með allt á hreinu og fengu þær því Heiðar "gamla" snyrti til að kenna þeim réttu taktana.

Athygli vekur að Heiðar bauð upp á augnhimnulestur við þetta tækifæri. "Sumir fara í augnhimnulestur heilsunnar vegna en fyrir mér eru augun spegill sálarinnar," segir Heiðar. "Og þar sem ég er orðinn svo gamall og ljótur verð ég bara að horfa í aðra spegla," bætir hann við en Heiðar segist geta reiknað út andlega líðan með þessari aðferð.

Heiðar er hættur í fluginu, ritstýrir nú vefsíðunni brudurin.is og sinnir auk þess tilfallandi verkefnum sem hann segir nóg af. "Ég er að undirbúa Páska-tælinguna núna en hún verður bara bönnuð á föstudaginn langa," segir Heiðar og skellir upp úr.