Heilmikið húllumhæ

Haldið verður upp á 140 ára verslunarafmæli Borgarness í dag. Skólahljómsveit Akraness, undir stjórn Önnu Bjarkar Nikulásardóttur, fer fyrir skrúðgöngu frá Hyrnutorgi að Landnámssetri í fylgd unglinga úr Óðali í Borgarnesi klukkan 15.00. Verður förinni heitið að Landnámssetrinu þar sem viðamikil dagskrá verður haldin í allan dag. Víða annars staðar í bænum verða jafnframt ýmsar uppá­komur.

„Þetta verður heilmikið húllumhæ," segir Fríða Sveinsdóttir, verkefnisstjóri. Hún segir að megnið af dagskránni séu skemmtiatriði úr sveitarfélaginu. „Það er gaman að geta þess að tónlistarskólinn er með tvö atriði en skólinn var stofnaður í tilefni af hundrað ára afmæli Borgarness, þannig að hann á fjörutíu ára afmæli," segir Fríða. „Síðan verður sýnd mynd sem Einar Ingimundarson tók sem ég veit að margir hlakka til að sjá. Hún var tekin á afmælisdeginum fyrir fjörutíu árum og sýnir mannlífið á þeim degi."

Fríða segir að Borgarnes sé ennþá mikill verslunarbær, 140 árum eftir að hann fékk löggildingu. Sér hún fram á bjarta framtíð í bæjarfélaginu. „Borgarnes hefur verið og er ennþá þjónustukefli fyrir þá sem búa hérna og þá sem eiga hér leið um. Það er afskaplega gott hljóðið í okkur og gengur alltaf afar vel. Það hefur verið mikill uppgangur bæði í atvinnulífi og íbúaþróun. Við erum með tvo háskóla í þessu sveitarfélagi og síðan kemur menntaskóli í haust þannig að það er flott framtíð hjá okkur."

Í tilefni af afmælinu eru allir þeir sem hafa yfir að ráða fánastöngum í Borgarnesi hvattir til að draga fána að húni í dag.