Brúðkaup í vændum

Spjallþáttadrottningin Ellen DeGeneres og leikkonan Portia di Rossi ætla að ganga í það heilaga í sumar. Þær hafa verið saman síðan árið 2004. Di Rossi, sem er hvað frægust fyrir leik sinn í Ally McBeal, og síðar Arrested Development, var þá nýhætt með söngkonunni Francescu Gregorini, stjúpdóttur Ringo Starr.

Di Rossi hafði forðast allar spurningar um kynhneigð sína og samband við Gregorini á meðan á því stóð, en kom opinberlega út úr skápnum eftir að hún og Ellen DeGeneres byrjuðu saman.

Samkvæmt National Enquirer er það Di Rossi sem krefst þess að þær gifti sig. Athöfnin fer væntanlega fram á heimili þeirra í Kaliforníu í júní.